ናይ ሓዘን መግልጺ፡ ንዕረፍቲ መምህር ተስፉ ዘውደ

መምህር ተስፉ ዘውደ፡ ኣብ ሓጺር ግዜ ብዝሓደሮ ሕማም፡ ብዕለት 02.06.2023 ኣብ ከተማ ዳርምሽታት ሃገረ ጀርመን ካብ’ዛ ዓለም ምፍላዩ ምስ ተረዳእና፡ ንሕና መቓልስቱ ኣባላት መቓልሕ ኤርትራ ኦርጋናይዘሽን ዝተሰምዓና መሪር ሓዘን ንገልጽ።

መምህር ተስፉ ዘውደ፡ ምስ ህዝባዊ ግንባር ተሰሊፉ፡ ኣብ ሜዳ ኤርትራ እናተቓልሰ እንከሎ፡ ብዝወረዶ መውጋእቲ ምስንካሉ ጥራሕ ዘይኰነ፡ ብድሕሪኡ’ውን ብሰንክ’ቲ ንምልካዊ ኣገባብ ምሕደራ ዘማዕብል ዝነበረ ኣድሓርሓሪ ጉጅለ መሪሕነት ኢሳያስ ዘቕርቦ ዝነበረ ነቐፌታታት፡ ካብ’ቲ 

ንምቕንጻሉ  ብምድግጋም ዝውጠን ዝነበረ እከይ ስርሓት ከምልጥ ክኢሉ እዩ። ይኹን’ምበር በቲ ዘየቛረጸ ናይ ምቕንጻል ብድሆታት እቲ’ውን ንስደት ከምርሕ ተገደደ።

ኣብ ናይ ስደት ሃገሩ’ውን ጸረ ምልካዊ ጉጅለ ህግደፍ ዓጢቑ፡ ንምትካል ደሞክራሲያዊ ስርዓትን፡ ንምንጋስ ሰላምን ፍትሕን ኣብ ኤርትራ ዕዙዝ ናይ ቃልሲ ግደ ኣበርኪቱ እዩ። ንመሰል ኤርትራውያን ስደተይናታትን ንክመሓየሽን፡ ኣረኣእያታቶም ንክምዕብልን ምስ መቓልሕ ኤርትራ ኦርጋናይዘሽንን ካልኦትን ተቓሊሱ ጥራሕ ዘይኰነ’ውን ኣብ ምትሕብባርን ምድልዳልን ኤርትራዊ ሲቢላዊ ማሕበራት ኤውሮጳ ይኹን ኣብ ምውህሃድን ምብርታዕን ምሕዝነት ሃገራዊ ሓይልታት ኤርትራ ቀጺሉ’ውን ኣብ ምምስራት ሃገራዊ ባይቶ ንዲሞክራሲያዊ ለውጢ ክሳብ ጉባኤ ሃዋሳ ተሳቲፉ እዩ።

ክሳብ’ታ ካብ’ዛ ዓለም ዝተፈልየላ እዋን፡ ቅኑዕ ሃገራዊ ባህግታት ንምርግጋጽ፡ ኣብ ጉዕዞ ቃልስታቱ ከይተሐለለ ደኺመ’ውን ከይበለ፡ ብፍላይ ኣብተን ብጽኑዕ ሐሚሙ አብ ትሕቲ ጽላል ሕክምና እናተሳቐየ ዝሓልፈን ዝነበረ እዋናት፡ ንሐንቲ ደቂቕ’ውን ትኹን ካብ ቃልሲ ከይቦኸረ፡ አብ ጎኒ ናይ ቀርባ ብጾቱ ኰይኑ ቃልሱ ቀጸለ። ምስ አብ ርሑቅን ቀረባን ዝርከቡ ኩሎም ፈተውቱን ብጾቱን’ውን ብዘይ ምስልቻው ይዛተን ይመኻኸርን ይምዕድን ነበረ፡፡ ብግንባረ-ቀደም ምምካት ድሕር ዘይብል ሓርበይንናን ማሕበራዊ ሓላፍነት ዝስከምን፡ ውፉይ ዲሞክራስያዊ፡ ተቃላሳይ እዩ ዝነበረ።

ብርግጽ ሰብ መዋታይ ታሪኹ ግን ነባሪ እዩ ከም ዝበሃል ድማ እቲ ሒዝዎ ዝጸንሔ ቅኑዕን ፍትሓውን ዝዀነ ህዝባዊ ዕላማ፡ በቶም ዝተረፉ አብ ቀልሲ ዘለዉ ኣህዛብ ኤርትራ ኣብ ፍጹም ዓወት ከም ዝብጽሕ አየጠራጥረናን። ክቡር ኣባልና መምህር ተስፉ ዘውደ ብዕለት 02.06.2023 ብምኽንያት ዕረፍቱ ካባና እንተ ተፈልየ፡ ብመንፈስን ሐሳብን ግን ኵሉ ግዜ አብ ጎንና ህሉው እዩ። ዝተቓለሰሉ ዕላማ ኣብ መፍጸምታኡ ንምብጻሕ ቃልስና ቀጻሊ እዩ።

ጽንዓት ንክብርቲ በዓልቲ ቤቱን ንዅሉም ቤተሰቡን ፈተውቱን ብጾቱን፡ ሰላማዊ ዕረፍቲ ድማ ንሓውናን ብጻይናን መምህር ተስፉ ዘውደ።

መቐልሕ ኤርትራ ኦርጋናይዘሽን ዝተ. ማ.